សៀមរាប៖ ពាក្យថា «នឿយកាយតែសប្បាយចិត្តព្រោះបានធ្វើការបំរើជាតិនិងប្រជាជន» គឺជាពាក្យដែលនាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានលើកឡើងបន្ទាប់ពីសម្ដេចធ្វើដំណើរមកដល់ខេត្តសៀមរាបព្រឹកថ្ងៃទី៣០ ខែកញ្ញា ឆ្នាំ២០២២នេះ។

មកដល់ថ្ងៃនេះគឺសម្ដេចតេជោបានធ្វើការងារទាំងក្នុងនិងក្រៅប្រទេសរយៈពេល ១០ថ្ងៃជាប់គ្នាហើយបើគិតពីចំនួននៃការធ្វើដំណើរគឺមិនតិចជាង ៣ម៉ឺនគីឡូម៉ែត្រនោះទេ។

សម្ដេចតេជោបានសរសេរនៅលើហ្វេសបុកផេក របស់សម្ដេចនៅព្រឹកថ្ងៃទី៣០ ខែកញ្ញានេះថា ដំណើរដ៏វែងឆ្ងាយដែលគ្មានពេលឈប់សម្រាកបានក្លាយជាទម្លាប់តាំងពីក្មេងរបស់សម្ដេចមកហើយ គឺជាកិច្ចការដែលចាំបាច់ដែលតម្រូវឲ្យធ្វើ

ដោយខានមិនបាន។

សម្ដេចថា៖ «ភ្នំពេញ-ញូយ៉ក-ឡាហាវ៉ាន-តូក្យូ-ភ្នំពេញ-សៀមរាប ប្រើរយៈពេល ១០ថ្ងៃចម្ងាយរាប់មុឺនគីឡូម៉ែត្រជាមួយការងារយ៉ាងច្រើន។

នឿយកាយតែសប្បាយចិត្តព្រោះបានធ្វើការបំរើជាតិនិងប្រជាជន»។

គួរឲ្យដឹងផងដែរថា សម្ដេចតេជោ ហ៊ុន សែន បានធ្វើដំណើរមកដល់ក្រុងសៀមរាប ខេត្តសៀមរាប នៅព្រឹកថ្ងៃទី៣០ ខែកញ្ញានេះ ដើម្បីធ្វើជាអធិបតីនិងសំណេះសំណាលជាមួយពលរដ្ឋក្នុងពិធីចាប់ឆ្នោតរើសទីតាំងរស់នៅក្នុងភូមិធម្មជាតិរុនតាឯក ក្នុងខេត្តសៀមរាប៕